Cleverly frá fram að jólum

Sir Alex Ferguson, knattspyrnustjóri Manchester United, hefur staðfest að miðjumaðurinn Tom Cleverley verði frá vegna meiðsla fram að jólum.

Cleverley er með skaddað liðband í ökkla en hann meiddist í leik gegn Everton í síðasta mánuði. Þá var hann nýbyrjaður aftur eftir önnur meiðsli.

„Meiðslin eru verri en við töldum,“ sagði Ferguson á blaðamannafundi í morgun. „Hann verður frá fram að jólum. Það er afar óheppilegt.“

„Þegar hann fór út af í leiknum gegn Everton kvartaði hann undan óþægindum og sagðist bara vera stirður. En rannsóknir sýna að meiðslin eru alvarleg og að hann þurfi á hvíld að halda.“

Michael Owen verður einnig frá fram að jólum og þá mun annar sóknarmaður, Danny Welbeck, missa af leik United gegn Swansea á morgun. Chris Smalling er enn meiddur en þeir Darron Gibson, Rafael da Silva og Ashley Young verða allir klárir í slaginn á morgun.