Stuðningsmaður Man. Utd vill selja Aguero bílnúmerið KUN16

Ryder Owen, klettharður stuðningsmaður Man. Utd, hélt hann væri að gera gáfulegan hlut er hann greiddi háar fjárhæðir fyrir bílnúmeraplötuna: "KUN16". Owen hélt á þeim tíma að Sergio Aguero væri á leið til Man. Utd en úr varð nokkru síðar að hann samdi við erkifjendurna í Man. City.

Nú vill Owen eðlilega losna við númerið og hefur nýtt fjölmiðla til þess að koma þeim skilaboðum til Aguero að númerið sé til sölu. Aguero kallar sig Kun og spilar í treyju númer 16.

"Ég bara verð að losna við númerið. Ég verð fyrir stöðugum árásum frá félögum mínum. Sérstaklega eftir að City vann United og Aguero skoraði. Það fór alveg með það," sagði Owen sem er enn með böggum hildar.

Nú er spurning hvort Aguero skeri stuðningsmanninn niður úr snörunni en sá mun gefa hluta ágóðans til UNICEF.