Owen með tvö mörk fyrir Man. United - Bolton sló út Aston Villa

Varalið Manchester United átti ekki í miklum vandræðum með Leeds á Elland Road í kvöld í 3. umferð enska deildarbikarsins. United vann 3-0 þar sem öll mörkin komu í fyrri hálfleik. Michael Owen skoraði tvö mörk í kvöld í sínum fyrsta leik í byrjunarliði. Arsenal og Bolton komust einnig áfram í enska deildarbikarnum í kvöld.

Michael Owen fékk sitt fyrsta tækifæri í byrjunarliði Manchester United á tímabilinu og var búinn að skora tvö mörk eftir rúman hálftíma. Fyrra markið skoraði Owen eftir sendingu Ji-Sung Park á 15. mínútu og það síðara eftir sendingu Mame Biram Diouf.

Ryan Giggs skoraði síðan þriðja markið á lokamínútu fyrri hálfleiks eftir að hafa farið illa með varnarmann Leeds. United lét þetta nægja og engin mörk voru skoruð í seinni hálfleiknum.

Grétar Rafn Steinsson var í byrjunarliði Bolton sem vann 2-0 sigur á Aston Villa á Villa Park. Chris Eagles og Gaël Kakuta skoruðu mörkin í seinni hálfleik.

Arsenal vann 3-1 sigur á 2. deildarliði Shrewsbury Town á heimavelli en það byrjaði ekki vel fyrir Arsenal þegar James Collins kom gestunum í 1-0 á 16. mínútu. Kieran Gibbs náði að jafna leikinn á 33. mínútu með skalla eftir fyrirgjöf frá Carl Jenkinson.

Alex Oxlade-Chamberlain kom Arsenal síðan yfir á 58. mínútu með sínu fyrsta marki fyrir félagið og Yossi Benayoun innsiglaði síðan sigurinn tólf mínútum fyrir leikslok.  Allir markaskorarar Arsenal í kvöld voru að skora sitt fyrsta mark fyrir félagið.



Úrslitin í enska deildarbikarnum í kvöld:

Aldershot Town - Rochdale    2-1

0-1 Ashley Grimes (45.), 1-1 Michael Rankine (47.), 2-1 Daniel Hylton (78.)

Arsenal - Shrewsbury Town    3-1

0-1 James Collins (16.), 1-1 Kieran Gibbs (33.), 2-1 Alex Oxlade-Chamberlain (58.), 3-1 Yossi Benayoun (78.)

Aston Villa - Bolton    0-2

0-1 Chris Eagles (54.), 0-2 Gaël Kakuta (77.)

Burnley - Milton Keynes Dons    2-1

0-1 Daniel Powell (6.), 1-1 Kieran Trippier (59.), 2-1 Andre Bikey (90.)

Leeds United - Manchester United    0-3

0-1 Michael Owen (15.), 0-2 Michael Owen (32.), 0-3 Ryan Giggs (45.)

Nottingham Forest - Newcastle    2-2 (framlengt)

0-1 Peter Løvenkrands (39.), 1-1 Robbie Findley (46.), 1-2 Peter Løvenkrands (60.), 2-2 Matt Derbyshire (66.)

Stoke - Tottenham    0-0 (framlengt)

Wolves - Millwall    5-0

1-0 David Edwards (3.), 2-0 Adam Hammill (7.), 3-0 George Elokobi (38.), 4-0 James Spray (77.), 5-0 Adlene Guedioura (88.)