Umfjöllun: Enn eitt tapið hjá Fram

Framarar tóku í kvöld á móti ÍBV í 12. umferð Pepsí deildar karla. Heil 13 stig og 9 sæti skildu liðin að fyrir leik kvöldsins og bilið jókst enn meir eftir leikinn.

Eyjamenn voru fremri á öllum sviðum knattspyrnunnar og innbyrtu 0-2 sigur á slökum Frömurum. Framarar sem eflaust voru með bjartsýnara móti fyrir leikinn eftir góðan sigur í síðustu umferð voru dregnir strax niður á jörðina því Eyjamenn fengu 3 færi á fyrstu 10 mínútum leiksins.

Fyrri hálfleikur var þó með rólegra móti og var það ekki fyrr en á 36. mínútu sem Eyjamenn skoruðu fyrsta mark leiksins en það gerði Andri Ólafsson úr vítaspyrnu eftir að Kristján Hauksson hafði brotið klaufalega á sér innan vítateigs.

Eyjamenn stjórnuðu leiknum áfram í seinni hálfleik án þess þó að ná að klára leikinn með öðru marki. Á 61. mínútu gerði Þorvaldur Örlygsson þjálfari Fram þrefalda skiptingu og við það virtist færast örlítið líf í heimamenn en Þórarinn Ingi Valdimarsson skar snögglega á þá líflínu með marki á 77. mínútu.

Þórarinn fékk stungusendingu upp vinstri kantinn og komst einn í gegnum vörn Framara og lagði boltann undir Ögmund sem kom aðvífandi á móti. 0-2 og sigurinn nánast í höfn hjá ÍBV.

Knattspyrnan sem boðið var upp á var ekki með glæsilegasta móti og í raun var spilamennska Framara ákaflega döpur. Eyjamenn hinsvegar gerðu einfaldlega sitt og kláruðu leikinn þægilega. ÍBV liðið sýndi með þessum leik að þeir ætla að halda sér í toppbaráttunni og er titill í haust vel raunhæfur ef vel er haldið á spilum.

Framarar hinsvegar virðast því miður vera í allskonar klandri. Varnaleikur þeirra var virkilega óöruggur, miðjan ógnaði lítið fram á við og þjónustaði sóknarmennina lítið sem ekkert. Kristinn Halldórsson á hægri vængnum var með skárra móti hjá heimamönnum en að auki má nefna Ögmund í markinu sem varði oft glæsilega.

Í gestaliðinu þótti Finnur Ólafsson fremstur á meðal jafningja en Finnur stjórnaði miðjuspili gestanna af festu og barðist um alla lausa bolta.