Neville hetja Everton sem sló út Chelsea

Everton bar sigur úr býtum gegn Chelsea í fjórðu umferð ensku bikarkeppninnar í dag en úrslitin réðust ekki fyrir en í vítaspyrnukeppni. Staðan var 0-0 eftir venjulegan leiktíma en bæði liðin náðu að skora í framlengingunni og því lauk leiknum með 1-1 jafntefli. Það var Phil Neville sem var hetja Everton en hann skoraði úr síðustu vítaspyrnu Everton og kom liðinu áfram.

Liðin mættust 29. janúar í fjórðu umferð enska bikarsins og þá fóru leikar jafnt 1-1, því þurfti annan leik til að ná fram úrslitum. Fyrri leikurinn fór fram á Goodison Park, heimavelli Everton, en í dag var leikið Stamford Bridge.

Fernando Torres var ekki í leikmannahópi Chelsea í dag en hann lék með Liverpool í sömu keppni fyrr á þessu tímabili og var því ekki gjaldgengur fyrir Lundúnaliðið. Chelsea hafði ekki skorað mark í síðustu tveimur leikjum liðsins sem verður að teljast virkilega sjaldgæft.

Heimamenn réðu lögum og lofum í fyrri hálfleik og fengu mörg færri til þess að skora en inn vildi boltinn ekki. Florent Malouda, leikmaður Chelsea, lék virkilega vel í fyrri hálfleiknum og Seamus Coleman, hægri bakvörður Everton, virtist ekkert ráða við hraðann hjá Frakkanum.

Heimamenn vildu fá vítaspyrnu rétt fyrir lok fyrri hálfleiks þegar Tim Howard virtist brjóta á Ramires, leikmanni Chelsea, sem var sloppinn einn í gegn en í staðin fékk Ramires gult spjald fyrir leikaraskap. Virkilega umdeildur dómur en líklega átti dómarinn að dæma vítaspyrnu.

Mark frá Chelsea lá heldur betur í loftinu í byrjun síðari hálfleiks en boltinn hreinlega neitaði að fara inn fyrir marklínuna. Tim Howard varði oft á tíðum meistaralega í marki Everton.

Tveimur mínútum fyrir lok venjulegs leiktíma náði Marouane Fellaini, leikmaður Everton, að skora mark sem var dæmt af vegan rangstöðu. Everton-menn spýttu heldur betur í lófana undir lokin og pressuðu stíft að marki Chelsea. Eftir venjulegan leiktíma var enn jafnt og því þurfti að framlengja.

Þegar um 13 mínútur voru liðnar af framlengingunni náðu heimamenn í Chelsea loksins að koma boltanum í markið. Boltinn barst til Frank Lampard inn í vítateig og enski landsliðsmaðurinn skoraði með laglegu skoti.

Everton-menn neituðu aftur á móti að gefast upp og þegar ein mínúta var eftir af framlengingunni fékk Everton aukaspyrnu á hættulegum stað. Leighton Baines, leikmaður Everton, gerði sér lítið fyrir og skoraði beint úr aukaspyrnunni og hélt lífi í liði sínu. Vítaspyrnukeppni var því staðreynd.

Vítaspyrnukeppnin var æsispennandi, en það var reynsluboltinn Phil Neville sem var hetja Everton þegar hann skoraði úr síðustu spyrnu Everton og kom sínu liði áfram í fimmtu umferð ensku bikarkeppninnar. Ashley Cole hafði áður misnotað síðustu spyrnu Chelsea.

Vítaspyrnukeppnin:

Chelsea – Frank Lampard skoraði

Everton – Leighton Baines lét Peter Cech verðja frá sér

Chelsea – Didier Drogba skoraði

Everton – Phil Jagielka skoraði

Chelsea –Tim Howard varði meistaralega frá Nicolas Anelka

Everton – Mikel Arteta skoraði örugglega

Chelsea – Mikel Essien skoraði

Everton – Johnny Heitinga skoraði

Chelsea - Ashley Cole skaut langt yfir markið

Everton – Phil Neville skoraði örugglega, Everton sigraði vítaspyrnukeppnina 4-3