Stórbruni í Kaupmannahöfn, hundrað flýja heimili sín

Slökkviliðið í Kaupmannahöfn hefur barist við stórbruna í alla nótt í íbúðablokkarsamstæðu við suðurhöfn borgarinnar.

Yfir hundrað manns þurftu að flýja heimili sín úr 13 stigagöngum í blokkinni en hún liggur að þremur götum, Mozartvej, Beethovenvej og Schubertsvej.

Slökkviliðinu barst tilkynning um brunann klukkan þrjú í nótt að staðartíma en þá logaði mikill eldur í þaki blokkarinnar. Allt tiltækt slökkvilið var kallað á staðinn og það var fyrst fimm tímum síðar að tókst að ná tökum á eldinum.

Samkvæmt fréttum í dönskum fjölmiðlum er ekki vitað til þess að manntjón hafi orðið og slökkviliðið vonar að öllum íbúunum hafi tekist að koma sér út af heimilum sínum. Eldsupptök eru óljós.