Ferguson: Owen þarf ekki að hafa áhyggjur

Sir Alex Ferguson, knattspyrnustjóri Manchester United, hefur greint framherjanum Michael Owen frá því að hann sé mikilvægur hlekkur í liðinu og þurfi ekki að hafa áhyggjur af stöðu sinni. Owen fékk ekki að spreyta sig gegn fyrrum liðsfélögum sínum í Newcastle í fyrstu umferð úrvalsdeildarinnar þar sem United fór með öruggan 3-0 sigur af hólmi.

„Michael þarf ekki að hafa neinar áhyggjur af stöðu sinni. Hann er mikilvægur hluti af liðinu," segir Ferugson en koma Javier Hernandez hefur sett stöðu Owen í vafa.

Sjálfur segist Owen ekki kvarta yfir því að vera inn og út úr liði United þó erfitt sé að viðhalda leikforminu þegar mínúturnar eru fáar. „Það sem er erfiðast er að vera ekki reglulega í liðinu. Það er hægt að gera margt í líkamsræktinni en það er ekki nóg," segir Owen sem er í leikmannahópi United fyrir leik liðsins gegn Fulham á útivelli í dag.