Klámkóngur betri en íslenskir bankamenn

Stuðningsmenn West Ham eru ekki allir ánægðir með nýju eigendurna hjá West Ham United.  David Sullivan og David Gold sem eignuðust 50 prósenta hlut í félaginu í gærkvöldi þykja harðir í horn að taka.

Þeir keyptu Birmingham City á 1 pund fyrir 16 árum og fengu 82 milljónir punda þegar þeir seldu félagið í nóvember á síðasta ári. 

Á spjallvef Evening Standard skrifar Robert í Birmingham að „aparnir Sullivan og Gold“ hafi ekki sett eitt einasta penní í félagið undanfarin 7-8 ár þegar Birmingham var í bullandi fallhættu en hirt ágóðann þegar þeir seldu félagið. 

Annar stuðningsmaður, Paul í London, segir að það sé fyndið að það þyki meiri reisn yfir því að félagið sé í eigu klámkongs frekar en hóps íslenskra bankamanna. 

David Gold, annar eigandanna, græddi nefnilega á tá og fingri á sölu á ýmsum varningi sem venjulega er ekki til sölu á virðulegum stöðum, hvað þá í sjoppunni hjá West Ham.