Játar sig sigraðan

Jaroslaw Kaczynski hefur játað sig sigraðan í seinni umferð forsetakosninganna í Póllandi sem fóru fram í dag. Hann fékk um 47% atkvæða í kosningunum og mótframbjóðandi hans, Bronislaw Komorowski, 53% samkvæmt útgönguspám sem voru birtar eftir að kjörstöðum lokaði.

Ekki er búist við lokatölum fyrr en á morgun en þrátt fyrir það viðurkenndi Jaroslaw ósigur sinn í ræðu sem hann hélt á samkomu með stuðningsmönnum í Varsjá. Skömmu síðar hafði hann samband við Komorowski og óskaði honum til hamingju með sigurinn.

Kaczynski er tvíburabróðir Lech Kacyniski fyrrverandi forseta sem fórst í flugslysi í Rússlandi fyrr á árinu en Komorowski er fyrrverandi forseti þingsins og hefur gegnt embætti forseta síðan Lech Kaczynski lést.