Morðingi Malcolms X á reynslulausn

Thomas Hagan sem sakfelldur var fyrir morðið á blökkumannaleiðtoganum Malcolm X var látinn laus til reynslu í dag 45 árum eftir morðið. Hagan, sem nú er 69 ára gamall, var sá eini sem játaði aðild sína að morðinu en tveir aðrir voru einnig sakfelldir og voru þremenningarnir dæmdir í fangelsi í 20 ár hið minnsta. Hagan hefur fengið að stunda vinnu utan fangelsisins frá árinu 1988 en í dag er hann laus allra mála, haldi hann skilorðið.

Þremenningarnir voru allir meðlimir í öfgasamtökunum Nation of Islam en Malcolm X hafði verið einn af áhrifamönnum samtakanna. Hann sagði sig þó úr þeim og var það ástæða morðsins.