Feeney grunaður um morð í Írak

Donald Feeney, sem sat í fangelsi á Íslandi fyrir barnsrán, er grunaður um aðild að hrottalegu morði á græna svæðinu í Bagdad. Feeney var handtekinn í síðustu viku ásamt syni sínum en þeir gætu orðið fyrstu bandaríksu verktakarnir sem sóttir verða til saka í Írak.

Donald Feeney var mikið í fréttum snemma á tíunda áratugnum eftir að hann tók að sér að ræna tveimur stúlkum frá Íslandi í flóknu forræðismáli. Feeney var dæmdur í eins árs fangelsi en æsilegur flótti hans úr fangelsinu sem endaði í Vestmannaeyjum vakti mikla athygli á sínum tíma. Feeney hefur um langt skeið rekið öryggisfyrirtækið Corparate Training Unlimted sem starfar meðal annars í Írak.

Snemma í júní voru Feeney, sonur hans og þrír bandaríkjamenn til viðbótar handteknir í Bagdad grunaðir um aðild að morðinu á James Kitterman sem fannst látinn í bíl í miðborg Bagdad 22. maí sl. Hann hafði verið stunginn til bana og var bundinn á höndum og fótum. Kitterman var sextugur Texasbúi og eigandi verktakafyrirtækis sem starfar í Írak.

Bandaríkskar og íraskar sveitir handtóku Feeney og félaga og eru þeir nú í haldi írösku lögreglunnar. Málið hefur hlotið mikla athygli af þeim sökum að Feeney og félagar verða að öllum líkindum fyrstu bandarísku verktakarnir sem sóttir eru til saka í Írak eftir að Bandaríkjamenn réðust inn í landið. Bandarískir verktakar nutu lengi friðhelgi í landinu en henni var aflétt með lagabreytingu.

CNN hefur efftir heimildarmönnum sínum í Írak að Feeney haldi fram sakleysi sínu og félaga sinna við yfirheyrslur. Þó eru taldar miklar líkur á að ákæra verði gefin út á hendur honum og að málið fari fyrir dóm.