Bandaríski herinn á slóð N-kóreskra skipverja

Bandaríski herinn fylgist nú með norður kóreska skipinu Kang Nam, sem talið er flytja ólöglegan vopnabúnað eða tæki. Háttsettir yfirmenn í bandaríska hernum segjast ekki vita nákvæmlega hvað sé um borð, en skipið sé þekkt fyrir að flytja vafasaman varning.

Norður Kóreumenn hafa lýst því yfir að litið verði á allar tilraunir til að stöðva skip þeirra sem stríðsyfirlýsingu.

Michael Mullen, bandarískur aðmíráll og hátt settur embættismaður, fullyrti að bandarískir hermenn myndu ekki fara um borð í norður kóresk skip án leyfis, heldur biðja um heimild skipverja til að leita þar. Annað væri brot á samþykktum öryggisráðs Sameinuðu þjóðanna.

Mullen fullyrti þó að Norður Kóreumenn væru einungis að gera stöðu sína til lengri tíma erfiðari með háttsemi sinni.

Samskipti Norður Kóreu og Bandaríkjanna virðast stirðari með hverjum deginum sem líður.