Fernando Torres ekki með Liverpool á morgun

Fernando Torres verður ekki með Liverpool á móti Blackburn í ensku úrvalsdeildinni á morgun þrátt fyrir að vera byrjaður að æfa með liðinu. Torres hefur ekki spilað með Liverpool síðan 4. nóvember og er ekki tilbúinn samkvæmt mati læknaliðs Liverpool.

„Hann er búinn að æfa með liðinu en hefur ekki verið með nema á hluta af æfingununum," sagði Rafael Benítez, stjóri Liverpool, um spænska landsliðsframherjann sem er búinn að skora 10 mörk í 10 leikjum með Liverpool í ensku úrvalsdeildinni í vetur.

„Þetta hefur gengið vel hjá honum en hann er samt ekki tilbúinn ennþá. Hann hefur verið að taka þátt í nokkrum boltaæfingum með liðinu en það er of snemmt að nota hann á móti Blackburn," bætti Benítez við.