Ástralar gefa Bretadrottningu gullvagn

Ríkisstjórn Ástralíu hefur fært Elísabetu Englandsdrottningu að gjöf viðhafnarhestvagn úr gulli að verðmæti rúmlega 100 milljónir króna.

Sendu nú gullvagninn að sækja mig, segir í þekktum dægurlagatexta sem Bretadrottning getur sannarlega raulað fyrir munni sér. Vagninn, sem er gjöf frá ástralska forsætisráðherranum Kevin Rudd, er hin mesta í dvergasmíð og í honum segja sérfræðingar að sé meira gull en í nokkru farartæki sem smíðað hefur verið í Bretlandi í meira en 200 ár.

Meira en öld er síðan viðhafnarhestvagn var síðast smíðaður fyrir bresku konungsfjölskylduna en það gerðist árið 1902 fyrir krýningu Játvarðs VII. Nýja ökutækið er tæp þrjú tonn að þyngd þótt ekki sé það ýkjastórt enda að mestu leyti úr gulli.

Um 50 manns unnu að smíðinni og vart þarf að geta þess að ástralska þingið hefur gagnrýnt gjöfina harðlega. Kevin Rudd skellir þó skollaeyrum við slíkum áburði enda vagninn ekki hans hugmynd. Það var forveri hans í embætti, John Howard, sem hrinti verkinu í framkvæmd en smíðin tók tvö ár.