Allardyce: Engar fyrirspurnir borist

Sam Allardyce, stjóri Blackburn, segir að félagið hafi engar fyrirspurnir fengið vegna Norðmannsins Morten Gamst Pedersen en Celtic í Skotlandi er sagt hafa áhuga á honum.

Pedersen hefur ekki spilað jafn stórt hlutverk hjá Blackburn í vetur og áður undir stjórn Allardyce. Sjálfur vildi Pedersen ekki útiloka að hann væri á leið til Celtic en núverandi samningur hans við Blackburn rennur út í lok tímabilsins.

„Ég hef ekki fengið neinar fyrirspurnir vegna leikmanna minna," sagði Allardyce við enska fjölmiðla. „Einhver hvíslaði því að mér að Morten væri á leið til Celtic og sjálfsagt verður reglulega fjallað um þetta mál á næstu vikum."

Allardyce sagði að hann væri ekki að skoða það núna að endurnýja samninga við þá leikmenn sem eru nú á sínu lokaári.

„Framundan er mikil törn í bæði desember og janúar. Það hefði bara truflandi áhrif að fara að ræða samningsmál nú."