Benitez: Áttum skilið að vinna leikinn

Knattspyrnustjórinn Rafa Benitez hjá Liverpool viðurkennir að vítaspyrnudómurinn sem leiddi að jöfnunarmarki Liverpool í 2-2 jafntefli gegn Birminham í kvöld hafi verið vafasamur.

Benitez kvað Liverpool aftur á móti hafa átt skilið að vinna leikinn þar sem liðið var miklu meira með boltann og skapaði sér fleiri marktækifæri en gestirnir á Anfield-leikvanginum í kvöld.

„Ég er búinn tala við Ngog og hann viðurkenndi að hugsanlega hafi ekki verið um réttan dóm að ræða í vítaspyrnunni. Það sem skiptir hins vegar mestu máli er að við sköpuðum okkur nægilega mörg færi til þess að vinna leikinn en nýttum þó ekki. Við hefðum átt að vinna leikinn út af öllum þessum marktækifærum," sagði Benitez í leikslok í kvöld.

Til þess að auka pressuna á Benitez, sem hefur stýrt Liverpool til aðeins eins sigurs í síðustu níu leikjum liðsins, þá urðu Albert Riera, Yossi Benayoun og Daniel Agger fyrir meiðslum í leiknum.

Fyrirliðinn Steven Gerrard kom aftur á móti inná sem varamaður í lok fyrri hálfleiks í kvöld og komst í gegnum leikinn óskaddaður.