Al Qaeda hótar Þjóðverjum

Al Qaeda sendi frá sér skilaboð á Netinu um helgina þar sem þýskum hermönnum er hótað. Stjórnvöld í Þýskalandi segja að þetta bendi til þess að aukin hætta sé á hryðjuverkaárás á Þýskaland.

Á myndskeiðinu var minnst á þátttöku Þjóðverja í stríðinu gegn Talibönum í Afganistan. Titillinn á myndskeiðinu var „Björgunarpakkinn fyrir Þýskaland" og var með merki as-Sahab sem er hluti af al Qaeda.

„Hermennirnir ykkar eru hvergi óhultir," sagði grímuklæddur maður sem var með svartan túrban á höfðinu. „Ef Þjóðverjar eru svo barnalegir að halda að þeir geti komist upp með þetta þá eru stjórnmálamenn úr snertingu við veruleikann." Hann sagði jafnframt að hver sá sem gerði greinamun á al Qaeda og Talibönum hefði ekki skilning á óvininum.

Þýskaland á aðild að friðargæsluliði NATO í Afganistan og hefur samið um að senda 4500 hermenn þangað.

Talibanskir skæruliðar hafa lýst yfir ábyrgð á sjálfsmorðssprengju sem sprakk nærri þýska sendiráðinu í Kabúl á laugardag. Bandarískur hermaður og fjórir óbreyttir afganskir hermenn fórust í sprengingunni. Eftir árásina í Kabul sagði Frank-Walter Steinmeier, utanríkisráðherra Þýskalands, að Þjóðverjar væru skuldbundnir verkefni sínu í Afganistan. Það væri ekki hægt að hræða Þjóðverja frá því.