Hafði í hótunum við Bush

Leyniþjónustumenn í Bandaríkjunum handtóku nú undir kvöld mann sem hafði í hótunum við George W. Bush Bandaríkjaforseta fyrir utan girðingu sem umlykur Hvíta húsið í Washington. „Við handtókum mann fyrir að hafa í hótunum við forsetann fyrir utan girðinguna," sagði Malcolm Wiley talsmaður leyniþjónustunnar. „Hann skildi eftir sig grunsamlegan böggul," bætti Wiley við. Það varð til þess að leyniþjónustan lokaði svæðinu sem umlykur Hvíta húsið og er vanalegast opið almenningi. Wiley gaf engar nákvæmar upplýsingar um hinn handtekna. Hann sagði ekki fyrir hvað hann hefði verið kærður fyrir né hver hótun hans hefði verið.