Ólöf segir Ólaf fara með fleipur

Ólöf Guðný Valdimarsdóttir, fyrrverandi aðstoðarmaður Ólafs F Magnússonar borgarstjóra og fráfarandi varaformaður skipulagsráðs borgarinnar, segir borgarstjóra fara með fleipur og hafa dregið umræðuna niður á plan sem ekki sé embættinu sæmandi. Þetta kom fram í kvöldfréttum Ríkisútvarpsins.

Ólafur hefur sagt að það hafi legið fyrir í nokkurn tíma að Ólöf Guðný hafi ekki viljaðhafa samráð við borgarstjórnarflokk F-lista og borgarstjóra í skipulagsmálum. Ólöf Guðný hafi því sjálf tekið skref út úr skipulagsráði borgarinnar.

Ólafur hefur sakað Ólöfu Guðnýju um alvarlegt trúnaðarbrot þegar hún hafi vitnað til einkasamtala þeirra í fjölmiðlum sem fram fóru meðan Ólöf var aðstoðarmaður borgarstjóra.

Ólöf Guðný sagði á Rúv hafa unnið af trúmennsku fyrir borgarstjóra í skipulagsráði. Ólafur hafi lagt hart að henni að starfa þar áfram eftir að hann sagði henni upp störfum sem aðstoðamaður. Ólöf Guðný segir það ekki rétt að hún hafi ekki viljað starfa fyrir borgastjóra í skipulagsráði.

Í Kastljósi í gær sagði Ólafur að hann viki Ólöfu úr ráðinu þar sem hún hafi ekki viljað starfa með honum lengur né í þágu málefnasamnings meirihlutans. Ólöf Guðný segir að þetta sé rangt.

,,Ef ég væri að vinna á móti stefnu meirihlutans eða gæta einhverja eiginhagsmuna þar inni þá er ég nú ansi hrædd um að formaður skipulagsráðs vera fljótur að stoppa mig," segir Ólöf Guðný og bætir við að hún hafi hvorki fengið athugasemdir frá Ólafi né öðrum um störf sín í skipulagsráði.