Verkfalli handritshöfunda í Hollywood að ljúka

Skriður er nú kominn á samningaviðræður handritshöfunda og kvikmyndaframleiðslufyrirtækja í Hollywood. Töluverð bjartsýni ríkir í báðum herbúðum um að samkomulag sé í augsýn, jafnvel innan viku.

Óformlegar þreifingar hafa verið í gangi undanfarnar vikur meðal deiluaðila og kvisast hefur út að í þeim hafi stórum hindrunum fyrir nýjum samning verið rutt úr vegi.

Verkfall handritshöfunda er nú að sigla inn í fjórða mánuðinn. Framleiðsla á sjónvarpsþáttum hefur legið niðri svo gott sem frá upphafi verkfallsins en nú fer það að hafa áhrif á stórmyndagerðina í Hollywood fyrir sumarmarkaðinn í ár. Framleiðendur eru því áfjáðir í að ljúka þessu verkfalli sem fyrst.

Samkvæmt frétt í blaðinu New York Times um helgina komust aðilar að samkomulagi í meginatriðum á fundi sem haldinn var á föstudag en eftir á að ganga frá orðalagi hans og ýmsum öðrum atriðum.

Það voru einkum greiðslur fyrir efni sem dreift er á netinu sem aðilar voru ósammála um en niðurstaða hefur fengist um hvernig þeim skuli háttað. Samkvæmt heimildum New York Times er reiknað með að samkomulagið verði lagt fyrir tíu þúsund meðlimi samtaka rithöfunda í þessari viku.