Filipeysk dóttir Fischers fær arfinn

Jinky Young dóttir skáksnillingsins Bobby Fischer mun bráðlega fá hlut sinn í þeim eignum sem faðir hennar skildi eftir sig og eru metnar á rúmar 246 milljónir króna, fyrir utan gull sem hann átti og prósendur af kvikmyndinni, "Bobby Fischer Goes to War."

Þetta sögðu lögmennirnir Sammy Estimo og Rudy Tacorda eftir að fréttir bárust frá Reykjavík að Jinky Young ætti tilkall til arfsins.

Það er Filipeyska útgáfan af Daily Inquirer sem segir frá þessu í kvöld.

Þar segir einnig að fresturinn til þess að fá staðfestingu á arfinum hafi verið 17.maí, eða þremur mánuðum eftir fráfall Fischers sem lést þann 17.janúar.

Estimo segir að Fischer hafi haft samband við sig og Eugene Torre, sem er goðsögn í skákheiminum á Filipseyjum, þegar hann var í fangaklefa í japan og hafi viljað gerast Filipeyskur ríkisborgari. Það vildi Fischer svo hann gæti verið með dóttur sinni og eiginkonu, Marilyn.

Í fréttinni segir hinsvegar að Estimo hafi ráðlagt honum að falla frá þessum áætlunum sínum þar sem vegabréf hans hafi verið gert upptækt á Filipseyjum. Með hjálp skákvinar á Íslandi hafi Fischer getað fengið íslenskt vegabréf og flutti hann þangað í mars árið 2005.

Þar segir síðan að Jinky Young og móðir hennar hafi hitt Bobby á Íslandi í september árið 2005 en það hafi verið í síðasta sinn sem þau þrjú voru saman sem lítil fjölskylda. En Bobby var í daglegu sambandi við mæðgurnar í gegnum síma og sendi þeim mánaðarlegar greiðslur.