Zola biður um tíma

Gianfranco Zola telur sanngjarnt að verði í starfi knattspyrnustjóra West Ham í eitt ár áður en að hann verður dæmdur af verkum sínum þar.

West Ham hefur unnið aðeins einn af síðustu tíu leikjum sínum í ensku úrvalsdeildinni en Zola tók við starfi knattspyrnustjóra í september síðastliðnum.

„Ég er samningsbundinn West Ham og mun gera allt sem í mínu valdi stendur svo að liðinu gangi sem best. Ég ber mikla virðingu fyrir þeim sem borga mér launin mín og þeir hafa mikla trú á mér," sagði Zola. Björgólfur Guðmundsson er eigandi West Ham.

„En ég veit hvaða kröfur eru gerðar til manna í minni starfsgrein. Ég verð bara að einbeita mér að því að forðast það að lenda undir pressu. Ég hef verið hér í þrjá mánuði en kannski ætti eitt ár að fá að líða áður en ég er dæmdur af mínum verkum."

„Engu að síður verð ég að gera betur en ég hef gert í síðustu leikjum. Þetta byrjaði ágætlega í haust en sumir hlutir hafa einfaldlega ekki gengið upp síðan þá. Ég verð að halda áfram að vinna í að bæta þá hluti."