Lét ríkissjóð borga máltíðir

Cecilia Sarkozy, eiginkona Nicholas Sarkozys Frakklandsforseta, hefur skilað kreditkortinu sem hún fékk eftir að eiginmaður hennar sigraði í forsetakosningunum í Frakklandi í maí. Ástæðan er sú að franska blaðið Le Canard Enchaine greindi frá því að Cecilia notaði kortið í tvígang til að bjóða fólki út að borða og lét því ríkissjóð borga brúsann: samanlagt tæpar 35 þúsund krónur.

Laurent Wauquiez, talsmaður frönsku ríkisstjórnarinnar, segir að Cecilia hafi ákveðið að skila kreditkortinu til að komast hjá „öllum misskilningi.“ Að sögn talsmanns frönsku forsetahallarinnar notaði Cecilia kortið aðeins í þessi tvö skipti á síðustu tveimur mánuðum.-