Brown vill innleiða nýja stjórnarhætti

Gordon Brown, fjármálaráðherra Bretlands, lagði áherslu á að hann myndi innleiða nýja stjórnarhætti sem forsætisráðherra og leiðtogi Verkamannaflokksins í ræðu sem markaði upphaf baráttu hans fyrir leiðtogahlutverkinu.

Brown sagðist vonast til að hann hefði nýjar hugmyndir og þá reynslu til að leiða til enn betri tíma í Bretlandi og þá bauð hann hverjum sem er innan Verkamannaflokksins til þess að takast á við sig um leiðtogahlutverkið.

Brown sagði Verkamannaflokkinn hafa á síðustu tíu árum byggt upp sanngjarnara samfélag en gera þyrfti betur. Hann vildi að fólki sem legði hart að sér yrði umbunað og að landinu yrði stjórnað af sanngirni.

Þá sagðist hann ætla að styrkja efnahag landsins enn frekar, eyða fátækt meðal barna og finna leiðir til þess að takast á við loftlagsbreytingar í heiminum. Auk þess lagði hann áherslu á staðfestu í baráttunni við hryðjuverkahættuna.

Brown lagði einnig áherslu á að styrkja velferðarkerfið í Bretlandi og sagði menntun ástríðu sína. Hins vegar myndi hann leggja mesta áherslu á að takast á við erfið verkefni í heilbrigðisþjónustunni á fyrstu mánuðum sínum sem forsætisráðherra.

Sagði hann baráttu næstu vikna snúast um að ræða nýjar hugmyndir en jafnframt myndi hann ræða við fólkið í landinu og hlusta á hvaða áherslur það vildi í landinu.

Gordon Brown er fyrstur til að tilkynna að hann sækist eftir leiðtogahlutverkinu hjá Verkamannaflokknum og í morgun lýsti Tony Blair yfir stuðningi við hann í þeirri baráttu. Reikna flestir með að Brown taki við af Blair sem forsætisráðherra í sumar.