Hroki Ferguson efldi okkur

Robert Pires, fyrrum leikmaður Arsenal, segir að hrokafullar yfirlýsingar Sir Alex Ferguson og Manchester United hafi á sínum tíma verið aðal hvati leikmanna Arsenal fyrir einvígi liðanna í deildinni.

"Ég man ekki af hverju þessir leikir voru svona harðir en ég held að eftir því sem leið á hafi það verið hrokinn í Ferguson og United-liðinu sem náði fram því besta í okkur. Með hverjum sigrinum sagði Ferguson að hans lið væri best og að það tapaði aldrei fyrir Arsenal. Svona yfirlýsingar fara í taugarnar á leikmönnum," sagði Pires, sem nú leikur með Villarreal á Spáni.

Hann segir að þó Arsenal hafi alltaf háð mjög hörð einvígi við granna sína Tottenham og Arsenal í Lundúnum - hafi leikirnir við Manchester United verið í algjörum sérflokki.

"Það eru sex leikir á ári sem skipta mestu máli fyrir leikmenn Arsenal - leikirnir við Chelsea, Tottenham og Manchester United. Þessir leikir eru einfaldlega mikilvægari en aðrir leikir. Þegar ég var að byrja hjá Arsenal var United með yfirburði yfir Lundúnaliðin og því var hver sigur gegn þeim sérstakur," sagði Pires.

Hann rifjaði upp orð Arsene Wenger fyrir þessa sérstöku leiki.

"Wenger sagði okkur alltaf að róa okkur og spila bara okkar leik. Hann varaði okkur alltaf sérstaklega við því að fara í persónulegar rimmur við Roy Keane, Wayne Rooney eða Neville-bræður. Hann bað okkur alltaf að reyna að haga okkur eins og atvinnumenn alveg sama hvað United menn myndu gera - en ég veit að hann langaði gríðarlega mikið að vinna þessa leiki. Við þurftum heldur enga sérstaka hvatningu til að spila á móti United - hún er öll til staðar."

Leikur Arsenal og Manchester United verður sýndur beint á Sýn 2 klukkan 12:25 á morgun.