Ronaldo á að fara til Barcelona

Luiz Felipe Scolari, landsliðsþjálfari Portúgala, segir að Cristiano Ronaldo hjá Manchester United ætti að fara frá liðinu og ganga í raðir Barcelona á Spáni. Ronaldo hefur verið frábær með United í vetur, en "Stóri-Phil" segir tíma kominn á breytingar hjá hinum 22 ára gamla vængmanni.

"Ronaldo er búinn að ná tökum á öllum grunnþáttum fótboltans og nú held ég að hann hefði gott af að breyta til. Barcelona væri lið sem hefði gríðarlega gott af að fá leikmann á borð við Ronaldo, því ég held að hann myndi falla vel að leik manna eins og Ronaldinho. Það er líka miklu heppilegra loftslag og veðurfar á Spáni fyrir mann eins og Ronaldo heldur en á Englandi," sagði Scolari, sem vill hinsvegar ekki sjá að Ronaldo fari til Real Madrid.

"Cristiano þarf að spila þar sem hann er partur af liðsheild, ekki nokkrum stjörnum. Það þýðir ekkert að vera hjá liði sem byggir á stjörnum eða einstaklingsframtaki."