Rooney verður í enska hópnum

Wayne Rooney verður í enska landsliðshópnum sem mætir Spánverjum í vináttuleik á miðvikudagskvöldið, en framherjinn Andrew Johnson hefur dregið sig úr hópnum vegna ökklameiðsla. Leikurinn fer fram á Old Trafford í Manchester og verður sýndur beint á Sýn.

Rooney verður í hópnum þrátt fyrir að hafa meiðst lítillega í síðasta leik, en tilkynnt hefur verið að Jermaine Jenas hjá Tottenham verði ekki í hópnum. Joey Barton verður í fyrsta sinn í hópnum og þeir Jonathan Woodgate, Kieron Dyer og Gareth Barry koma aftur inn í hópinn efir áralanga fjarveru.

Þá missir Owen Hargreaves af leiknum, en hann er ekki búinn að ná sér að fullu eftir fótbrot og er smátt og smátt að komast á fullt með liði Bayern Munchen. Steven Gerrard mun bera fyrirliðabandið hjá enska liðinu því ljóst þykir að John Terry muni ekki spila allar 90 mínúturnar í leiknum eftir að vera nýbúinn að ná sér af erfiðum meiðslum.