Reglur um vegabréf mildaðar í USA

Reglur um framvísun vegabréfa fyrir Bandaríkjamenn á leið sinni inn og út úr Bandaríkjunum verða mildaðar í sumar. Sem kunnugt er hertust reglurnar mikið eftir hryðjuverkaárásirnar í New York 2001.

Þetta hefur valdið miklum seinkunum á vegabréfaskrifstofum. Það getur tekið allt að þremur mánuðum að fá vegabréf endurnýjað. Margur Bandaríkjamaðurinn er því vegabréfslaus nú þegar sumarfríin hellast yfir.

Samkvæmt nýju reglunum þurfa bandarískir ferðamenn þó ekki að framvísa vegabréfi á leið sinni til Kanada og Mexíkó, ef þeir geta sýnt fram að þeir séu ríkisborgar.

Fyrirkomulagið ríkir til 30 september.