Efast um að Mourinho snúi aftur til Englands

Sir Alex Ferguson segist hafa verið í sambandi við Jose Mourinho eftir að hann hætti störfum hjá Chelsea. Hann segist efast um að Portúgalinn snúi aftur til Englands í bráð.

"Ég er ekki viss um að hann komi aftur til Englands. Ég held að hann taki við toppliði á Ítalíu eða Spáni - og ég er næstum því viss um það," sagði Ferguson.

"Það er ekkert lið inni í myndinni hjá honum í augnablikinu enda er hann líka að taka sér smá hlé frá störfum. Hann ætlar sér að koma ferskur til starfa á ný en ég held að enginn geti gert sér í hugarlund hvar það verður sem hann tekur við nýju liði," sagði Skotinn.