Fordæmir há laun og hátt miðaverð

Gerry Sutcliffe, nýráðinn íþróttamálaráðherra á Englandi, fordæmir laun fyrirliðans John Terry hjá Chelsea og segir miðaverð á leiki í ensku úrvalsdeildinni vera rokið upp fyrir allt velsæmi.

Sutcliffe segir að himinhá laun knattspyrnumanna og hækkandi miðaverð séu að bola stuðningsmönnum frá íþróttinni.

"Ég óska John (Terry) alls hins besta, en það er hneyksli að maður skuli fá 150,000 pund í vikulaun. Og ársmiðaverð hjá Manchester United hefur hækkað um 13% og handhafar þeirra þurfa sjálfkrafa að kaupa miða á Evrópuleiki og deildarbikarleiki á 200 pund. Það tekur mikið frá hinum almenna stuðningsmanni," sagði Sutcliffe á ráðstefnu í Lundúnum í dag.

Hann er sjálfur stuðningsmaður Manchester United, en segir venjulegt fólk ekki hafa efni á að sjá liðið sitt lengur.

"Venjulegt vinnandi fólk hefur ekki efni á að sjá Manchester United spila lengur og ég tel að sé mikil hætta á því að fólk þurfi að fara að hætta að mæta á leiki. Það yrði mjög hættuleg staða fyrir félögin ef það fengi stuðningsmennina upp á móti sér," sagði Sutcliffe.

Hann segir að til greina komi að setja launaþak á leikmenn í deildinni.

"Fólk úti á götu hreinlega skilur ekki þessi ofurlaun sem menn á borð við John Terry eru að fá. Chelsea er rekið með 250 milljón punda tapi og þó félagið ráði við það - er þetta ekki í tengslum við raunveruleikann. Það er ekki hægt að réttlæta 250 milljón punda hallarekstur."

Forráðamenn Chelsea eru sagðir mjög óhressir með ummæli ráðherrans og fullyrða að hann hafi farið með rangt mál þegar hann talaði um rekstrartölur félagsins.

Sutcliffe mun viðra skoðanir sínar á fundi með Richard Scudamore, yfirmanns úrvalsdeildarinnar og David Gill, framkvæmdastjóra Manchester United í dag.