Stóryrði Sighvats koma Valgerði á óvart

Valgerður Sverrisdóttir utanríkisráðherra segir að sér komi á óvart viðbrögð Sighvats Björgvinssonar, framkvæmdastjóra Þróunarsamvinnustofnunar Íslands (ÞSSÍ), við nýrri skýrslu þar sem lagt er til að stofnunin verði felld inn í utanríkisráðuneytið.

„Ég ætla ekkert að munnhöggvast við Sighvat Björgvinsson í fjölmiðlum. Hann er forstöðumaður undirstofnunar ráðuneytisins og þar að auki sendiherra. Þannig að ég mun bara eiga fund með honum þegar hann kemur heim. En ég get að minnsta kosti sagt að þessi stóru orð sem hann notar koma mér á óvart.“

Þar vísar Valgerður í ummæli Sighvats í fjölmiðlum í gær þar sem hann segist ekki hafa vitað að þessar tillögur væru í undirbúningi og fordæmir hann vinnubrögð ráðuneytisins.

Í tilkynningu sem ráðuneytið sendi frá sér í gær er ummælum Sighvats hafnað. Er meðal annars greint frá fundi Þorsteins Ingólfssonar sendiherra, sem stýrði skýrslugerðinni, með Sighvati og stjórnarformanni stofnunarinnar í nóvember. Þorsteinn segist hafa rætt um gerð skýrslunnar við Sighvat í tvígang frá þessum fundi. Í seinna skiptið greindi Þorsteinn Sighvati frá tveimur mögulegum leiðum í skýrslunni og þar hafi önnur verið sú að færa stofnunina undir ráðuneytið.

Björn Dagbjartsson, fyrrverandi framkvæmdastjóri stofnunarinnar, segir skýrsluna skynsamlega og vel unna og undarlegt sé ef núverandi framkvæmdastjóra hafi dottið í hug að það ættu ekki að verða neinar breytingar. Björn, sem lét af starfi framkvæmdastjóra í lok árs 2000, hafði sjálfur lagt til að stofnunin yrði færð undir ráðuneytið að fordæmi hinna Norðurlandanna. „Það er orðið löngu tímabært að endurskoða lögin. Þau voru gjörsamlega úrelt orðin og hálfvandræði orðin að vinna eftir þeim.“

Í tilkynningu ráðuneytisins segir að markmið tillagnanna sé að ná betri heildarsýn á þróunarsamvinnu Íslands og draga úr hættu á tvíverknaði í rekstri og stjórnun.

Valgerður segist leggja skýrsluna fram einungis sem umræðugrundvöll og að hún muni ekki leggja fram frumvarp um slíkar breytingar á þessu þingi. Þá ítrekar hún að starfsöryggi starfsmanna stofnunarinnar yrði ekki stofnað í hættu við að færast inn í ráðuneytið. „Við erum að auka framlög til þróunarsamvinnu og það er frekar líklegt að það þurfi með tíð og tíma að fjölga starfsmönnum.“

Ekki náðist í Sighvat Björgvinsson.