Dómgæsla ársins hjá Webb

Íslandsvinurinn og fyrrum úrvalsdeildardómarinn Dermot Gallagher, segir kollega sína hafa átt dómgæslu ársins til þessa þegar þeir dæmdiu mark William Gallas hjá Arsenal gott og gilt í leiknum gegn Manchester United um helgina.

Mörk á borð við þetta hafa oft verið umdeild á Englandi, en eftir mikinn atgang á teignum hjá United náði Gallas að skjóta boltanum inn fyrir línuna. Edwin van der Sar markvörður sló boltann út úr markinu, en þá var knötturinn greinilega kominn inn fyrir línuna. Atvikið gerðist mjög hratt og Gallagher hrósar Howard Webb og aðstoðarmanni hans Darren Cann fyrir frammistöðu sína.

"Þetta var frábær dómgæsla því ef þú horfir á hvað þetta gerðist hratt, var ekki möguleiki fyrir línuvörðinn að sjá þetta nema vera einstaklega vel staðsettur. Það er gaman að tala um jákvæða punkta eftir svona stóran leik. Það er ekkert mál að sjá þetta í hægri endursýningu, en línuvörðurinn var í fullkominni aðstöðu og gerði vel," sagði Gallagher og segir Webb vera mikið efni í dómgæslunni.

"Hann hefur sannarlega alla burði til að verða einn besti dómari heimsins. hann er ungur og hæfileikaríkur og hefur góð tök á leikmönnunum. Hann les líka brot á vellinum mjög vel og með smá heppni held ég að við gætum verið að horfa upp á hann sem framtíðar HM dómara," sagði Gallagher.