Ronaldo skaut United á toppinn

Cristiano Ronaldo skoraði bæði mörk Manchester United í dag þegar liðið skaust á topp ensku úrvalsdeildarinnar með verskulduðum sigri á Blackburn 2-0 á Old Trafford.

Christopher Samba fékk ágætt færi til að koma gestunum í Blackburn yfir í dag en hafði ekki heppnina með sér þegar skot hans fór í þverslána á marki United. Cristiano Ronaldo skoraði hinsvegar mörkin tvö sem skildu að í dag. Annað með skalla og hitt með öruggri afgreiðslu.

Hafi Blackburn ætlað sér að jafna leikinn eftir það, er ljóst að þær dvínuðu til muna þegar David Dunn var rekinn af velli með tvö gul spjöld í síðari hálfleiknum.

Ronaldo er nú búinn að skora 26 mörk í 51 leik fyrir Portúgal og Manchester United á árinu 2007. United hefur nú þriggja stiga forystu á Arsenal á toppi deildarinnar, en Arsenal á tvo leiki til góða.

Tottenham færði stjóranum Juande Ramos góðan 4-0 sigur á Wigan í fyrsta leik hans á heimavelli í deildinni síðan hann tók við af Martin Jol. Leikurinn var algjörlega eign Tottenham frá upphafi til enda og hefði liðið með öllu átt að skora miklu fleiri mörk. Jermaine Jenas fór mikinn hjá Tottenham og skoraði tvö mörk í dag, en fór illa með nokkur færi til að bæta við það. Aaron Lennon og varamaðurinn Darren Bent skoruðu hin mörkin gegn lánlausu liði Wigan, en það var Búlgarinn Dimitar Berbatov sem var maður vallarins og átti þátt í flestum mörkunum hjá Tottenham.

Gary Megson þarf að bíða eitthvað lengur eftir sínum fyrsta sigri síðan hann tók við Bolton, en lið hans gerði markalaust jafntefli við Middlesbrough á heimavelli í dag. Bolton var betri aðilinn í leiknum og kom liðið vel stefnt til leiks eftir frábæran leik gegn Bayern í vikunni - en allt kom fyrir ekki.