Adriano vill fara til Manchester City

Brasilíski framherjinn Adriano hjá Inter hefur nú lýst því yfir að hann vilji komast að hjá félagi í ensku úrvalsdeildinnii þegar félagaskiptaglugginn opnar í janúar.

Framtíð Adriano virðist lítil hjá ítalska liðinu þar sem hann er orðinn fimmti framherji í goggunarröðinni hjá Mancini þjálfara. Telja má víst að félög á Englandi hefðu áhuga á að prófa Adriano og sagt er að Manchester City sé eitt þeirra. Sven-Göran Eriksson knattspyrnustjóri hefur ekki tjáð sig opniberlega um málið, en svo virðist sem Brasilíumaðurinn hafi mikinn áhuga á að fara til Englands.

"Ég er búinn að ræða við félagið og ég fer héðan í janúar. Manchester City er minn fyrsti kostur þar sem ég fengi að spila undir Sven-Göran Eriksson og ég veit fyrir víst að Inter hefur áhuga á að fá Rolando Bianchi," sagði Adriano í samtali við News of the World.

Framherjinn Bianchi fór á kostum á Ítalíu á síðustu leiktíð en hefur alls ekki náð að festa sig í sessi á Englandi þrátt fyrir að hafa skorað í sínum fyrsta leik í sumar.