Berbatov fundar með Tottenham í dag

Búlgarski framherjinn Dimitar Berbatov mun í dag halda fund með yfirmanni knattspyrnumála hjá Tottenham ásamt umboðsmanni sínum, en framtíð hans hjá félaginu þykir nokkuð óráðin eftir að Martin Jol fór frá félaginu.

Berbatov, sem í fyrra fór á kostum með liðinu á sínu fyrsta tímabili, hefur alls ekki náð sér á strik það sem af er þessari leiktíð - og hann var settur á bekkinn hjá liðinu um helgina.

Orðrómur hefur lengi verið á kreiki um að Berbatov færi frá Tottenham, en knattspyrnustjórinn Juande Ramos hefur þó lýst því yfir að hann hafi miklar mætur á framherjanum og vilji halda honum á White Hart Lane.