Aganefndin skoðar ummæli Ferguson

Aganefnd enska knattspyrnusambandsins ætlar að taka til skoðunar ummæli Sir Alex Ferguson eftir leik Arsenal og Manchester United um helgina þar sem Ferguson fór hörðum orðum um Howard Webb dómara. Ferguson sagði Webb hafa dæmt Arsenal í hag í leiknum í samtali við MUTV.

"Webb á möguleika á að verða góður dómari en hann dæmdi Arsenal í vil nokkrum sinnum. Annað mark þeirra kom eftir að brotið var á Louis Saha og þar hefðum við átt að fá aukaspyrnu," sagði Ferguson.

Ferguson sagði að mikil læti hafi verið við hliðarlínuna meðan á leiknum stóð.

"Það er erfitt fyrir dómara að dæma svona leik og við sem vorum í grennd við bekkinn vorum að fá rosalegar gusur og svívirðingar frá fólki sem stóð aðeins meter frá okkur. Öryggisgæslan þarna er alls ekki nógu góð og það er ótrúlegt að þurfa að standa undir þessum svívirðingum," sagði Ferguson.