Chelsea áfram eftir æsilegan leik

Chelsea tryggði sér naumlega áframhaldandi þáttöku í enska deildarbikarnum í kvöld með 4-3 sigri á Leicester í æsilegum leik á Stamford Bridge. Arsenal, Blackburn, Tottenham og Liverpool eru líka komin áfram eftir sigra í kvöld.

Chelsea lenti undir á heimavelli gegn Leicester en Frank Lampard kom liðinu í 2-1 fyrir hlé með tveimur mörkum. Þeir DJ Campbell og Carl Cort komu gestunum hinsvegar yfir í leiknum og Chelsea þurfti á tveimur dramatískum mörkum að halda í lokin til að tryggja sér sigurinn. Andriy Shevchenko jafnaði metin á 87. mínútu og Frank Lampard fullkomnaði þrennuna með skallamarki í blálokin eftir mistök markvarðarins Martin Fulop.

Arsenal vann nokkuð öruggan 3-0 útisigur á Sheffield United þar sem þeir Eduardo (2) og Denilson skoruðu mörk Lundúnaliðsins.

Tottenham lagði Blackpool 2-0 með mörkum frá Robbie Keane og Pascal Chimbonda tryggðu Juande Ramos sigur í fyrsta leik sínum í stjórastól hjá Tottenham.

Liverpool lagði Cardiff 2-1 þar sem þeir Nabil El Zhar og Steven Gerrard skoruðu fyrir Liverpool. Robbie Fowler var í liði Cardiff gegn sínum gömlu félögum og skipti á treyjum við vin sinn Gerrard eftir leikinn.

Manchester City vann fyrsta sigur sinn á Bolton síðan árið 2004 þegar Brasilíumaðurinn Elano fiskaði vítaspyrnu undir lok leiksins og skoraði úr henni sjálfur. City vann leikinn 1-0.

Þá vann Blackburn góðan 2-1 útisigur á Portsmouth þar sem Benni McCarthy og Morten Gamst Pedersen skoruðu mörk gestanna en Kanu mark heimamanna.

Leikur Luton og Everton var framlengdur eftir að staðan var jöfn 0-0 eftir 90 mínútur.