Ekkert lífsmark í skipsflaki

Kafarar hafa ekki fundið neinn af þeim sjö Tyrkjum sem saknað er eftir að fragtskip með ellefu manns um borð fór á hvolf við suðurströnd Danmerkur í gærkvöld. Kafararnir hafa bankað á dyr á káettum á skipinu og skoðað inn í stýrishúsið en könnunarleiðangur þeirra hefur ekki leitt neitt í ljós sem gæti bent til þess að fólkið væri á lífi. Sex karlmanna og einnar konu er saknað. Bæði þýskir og danskir kafarar taka þátt í leitinni í skipinu sem liggur um það bil 10 kílómetrum frá ströndinni.