Shinawatra tók upp budduna

Thaksin Shinawatra er sagður hafa brugðist skjótt við þegar hann hafði fregnir af því að illa gengi í samningaviðræðum við varnarmanninn Micah Richards hjá Manchester City.

Viðræður um framlengingu á samningi enska landsliðsmannsins hafa staðið yfir lengi en enginn árangur hefur náðst til þessa þó leikmaðurinn sé duglegur við að segja að nú sé stutt í að hann skrifi undir.

Umboðsmaður Richards er þannig sagður hafa heimtað að varnarjaxlinn fengi 50,000 pund í vikulaun fyrir nýja samninginn, en forráðamenn City voru meira að hugsa um 30,000 pund. Umboðsmaðurinn hefur bent á að hjá félögum eins og Manchester United og Chelsea væri maður eins og Richards að fá 50,000 pund í vikulaun og því gæti hann auðveldlega orðið sér út um þessi vikulaun með því að fara annað.

Shinawatra á að hafa brugðist skjótt við þegar hann heyrði af því hve miklu munaði í samningaviðræðunum og ætlar alls ekki að missa varnarmanninn - ekki frekar en Sven-Göran Eriksson knattspyrnustjóri. Eigandinn ætlar því að ganga að kröfum Richards og gera við hann samning sem fyrst. Þetta segir í grein í News of the World í dag.