Ferguson dásamar Rooney og Tevez

Sir Alex Ferguson fór ekki leynt með ánægju sína yfir samstarfi þeirra Carlos Tevez og Wayne Rooney í dag þegar Manchester United lagði Middlesbrough 4-1.

Samvinna þeirra félaga þótti ansi góð í leiknum, ekki síst þegar Rooney lagði upp fyrra mark Tevez með glæsilegri hælspyrnu.

"Ég held að liðið sé að slípast saman og þegar maður er með leikmenn eins og Ronaldo, Rooney, Tevez og Nani - munu þeir alltaf ná að skora mörk. Þeir eru frábærir leikmenn með gott hugmyndaflug og mikla sköpunargleði í leik sínum," sagði Ferguson og tók þá Rooney og Tevez út sérstaklega í dag.

"Þeir eru frábærir einstaklingar báðir tveir, en það sem við áttum eftir að finna út var hvernig við ættum að stilla þeim upp. Ég held að við séum búnir að sjá það núna að Rooney nýtist best á toppnum þar sem hann er með kraft, góða fætur, skallatækni og hraða og svo kemur Tevez inn þar fyrir aftan með hugmyndaflug sitt og leikni," sagði Ferguson.