Við vinnum ekki alla leiki 6-0

Avram Grant segir sigur sinna manna í Chelsea á Manchester City í dag bera þess vitni að hann ætli sér að láta liðið spila skemmtilegan bolta undir sinni stjórn. Sven-Göran Eriksson sagði sína menn hafa gleymt því hvernig á að spila varnarleik.

"Við höfum bætt okkur í hverjum leik síðasta mánuðinn. Leikmennirnir vilja verða betri og hafa sýnt það að þeir vilja spila skemmtilegan sóknarbolta og vinna. Við ætlum að njóta þessa sigurs í dag en við vinnum ekki alla leiki 6-0. Manchester City er erfitt lið viðureignar, en það var vinnusemi leikmanna sem skóp sigurinn. Stuðningsmennirnir vita að við erum að reyna að spila skemmtilegan bolta," sagði Avram Grant.

Sven-Göran Eriksson var að vonum ókátur með frammistöðu sinna manna, sem hafa ekki skorað mark á Stamford Bridge í háa herrans tíð.

"Við virtumst hafa gleymt því hvernig á að spila varnarleik. Ef þú gefur liði eins og Chelsea svona tíma og pláss, þá verður þér refsað með svona flengingu. Þetta var skelfilegur varnarleikur og við verðum að laga hann. Við höfum byrjað leiktíðina vel, en ég vorkenni stuðningsmönnum liðsins sem komu til Lundúna með okkur og vildu sjá okkur spila vel," sagði Eriksson.