Chelsea valtaði yfir City

Chelsea rótburstaði Manchester City 6-0 á Stamford Bridge í dag og Manchester United vann sannfærandi 4-1 sigur á Middlesbrough á Old Trafford.

Chelsea vann þriðja sigur sinn í ensku úrvalsdeildinni með því að mala Manchester City 6-0. Leikurinn var eign heimamanna sem höfðu yfir 2-0 með mörkum frá Michael Essien og Didier Drogba. Drogba bætti við öðru marki sínu í síðari hálfleiknum og þar náðu þeir Joe Cole, Salomon Kalou og Andriy Shevchenko einnig að komast á blað.

Manchester United átti ekki í teljandi vandræðum með Middlesbrough og vann 4-1 á heimavelli. Nani kom United yfir með frábæru skoti eftir aðeins þrjár mínútur en Jeremie Aliadiere jafnaði metin fyrir gestina skömmu síðar.

Nani lagði svo upp annað mark United fyrir Wayne Rooney, en Rooney lagði upp glæsilegt þriðja mark liðsins fyrir Carlos Tevez í síðari hálfleik. Það var svo Tevez sem skoraði fjórða markið eftir að skot hans hrökk af varnarmanni og í netið og því er United á toppnum í deildinni - í það minnsta fram að leik Liverpool og Arsenal á morgun.

Íslendingalið Reading vann dýrmætan heimasigur á Newcastle 2-1 þar sem varamaðurinn Shane Long skoraði sigurmark heimamanna undir lokin. Dave Kitson hafði áður komið Reading yfir í leiknum en varnarmaðurinn Michael Duberry skoraði sjálfsmark og jafnaði. Brynjar Björn Gunnarsson var í byrjunarliði Reading í dag en Ívar Ingimarsson sat á bekknum.

Wigan og Sunderland gerðu 1-1 jafntefli í áhugaverðum leik þar sem Wigan var yfir lengst af eftir frábært mark Simon Davies úr aukaspyrnu. Sunderland missti Greg Halford af velli með rautt spjald eftir það - en það kom ekki í veg fyrir að Kenwayne Jones jafnaði metin á 86. mínútu. Sunderland hefði geta stolið sigrinum í lokin ef ekki hefði verið fyrir góða markvörslu Anthony Stokes í lokin.

Birmingham lagði loks Wigan 3-2 í hörkuleik þar sem Oliver Kapo skoraði tvívegis fyrir heimamenn.