Líkti brottrekstrinum við framhjáhald

Breska blaðið Sun segir að Martin Jol hafi orðið mjög reiður út í stjórnarformann Tottenham þegar hann var rekinn frá félaginu í fyrrakvöld. Ekki vegna þess að hann var rekinn - heldur vegna vinnubragða stjórnarinnar.

Heimildir Sun herma þannig að Jol hafi í raun verið síðasti maðurinn sem fékk að vita að hann fengi að taka pokann sinn, en þegar lá ákvörðun fyrir um að reka hann fyrir Evrópuleikinn við Getafe.

"Þetta er eins og konan manns sé að halda framhjá manni og að allir viti það nema þú sjálfur," á Jol að hafa sagt. "Ég er ekki fúll yfir því að hafa veirð rekinn - ég er bara ósáttur við það hvernig staðið var að málum. Leikmennirnir vissu þetta allir og voru að senda vinum og vandamönnum skilaboð um það," sagði Jol.