Ramos hættur hjá Sevilla

Juande Ramos hefur sagt starfi sínu lausu hjá Sevilla og því virðist fátt því til fyrirstöðu að hann geti tekið við Tottenham á Englandi eins fram hefur komið í fjölmiðlum í dag.

Martin Jol var látinn taka pokann sinn hjá Tottenham í gærkvöld eftir skelfilega byrjun liðsins í haust og Ramos var strax orðaður við stöðuna. Hann átti eitt ár eftir af samningi sínum en sagði upp í kvöld. Hann hefur þegar kvatt stuðningsmenn Sevilla á heimasíðu sinni.

Þá hefur Marcos Alvarez, einn af þjálfurum Sevilla, einnig sagt af sér hjá félaginu.

Fregnir herma að Tottenham hafi boðið Ramos mjög feitan samning og þá er talið að félagið sé að reyna að fá fyrrum leikmann sinn, Gus Poyet, til að gerast aðstoðarmann Ramos. Poyet er aðstoðarmaður Dennis Wise, stjóra Leeds. Hann lýsti því yfir í viðtali í kvöld að hann gæti vel hugsað sér að ræða við Tottenham ef félagið sýndi sér áhuga - en forráðamenn Leeds eru reyndar ekki jafn hrifnir af þeirri hugmynd og hafa beðið hann að halda sig frá liðinu fram yfir helgina til að skapa ekki óróa í herbúðum liðsins.

Poyet lék með Tottenham í þrjú ár og ef hann yrði fengin til félagsins yrði það ekki síður til að greiða fyrir Ramos á enskri tungu, því sá spænski talar ekki góða ensku.