Enn ein þrennan á Anfield?

Stórleikur helgarinnar í enska boltanum er án efa viðureign Liverpool og Arsenal á Anfield. Ef marka má söguna gæti farið svo að hér yrði um markaleik að ræða, en viðureignir Liverpool og Arsenal hafa leitt af sér flestar skoraðar þrennur í sögu úrvalsdeildarinnar.

Leikja Liverpool og Arsenal er jafnan beðið með sérstakri eftirvæntingu og hafa viðureignir liðanna ekki valdið vonbrigðum á síðasta áratug eða svo. Einvígi þessara liða eru sérstök fyrir þær sakir að leikmenn hafa náð að skora flestar þrennur í þessu tiltekna einvígi en nokkru öðru frá stofnun úrvalsdeildarinnar, eða fjórar talsins.

Það var ungur Robbie Fowler sem reið á vaðið leiktíðina 1994-95 þegar hann sallaði þremur mörkum á David Seaman á Anfield á aðeins fimm mínútum. Fowler var kosinn besti ungi leikmaðurinn í úrvalsdeildinni þetta árið og ótrúleg þrenna hans er sú skjótasta í sögu úrvalsdeildarinnar.

Arsenal-hrellirinn Fowler var svo aftur á ferðinni árið eftir þegar hann skoraði aftur þrennu gegn Arsenal á heimavelli í 3-1 sigri Liverpool.

Á síðustu leiktíð var það svo hinn leggjalangi Peter Crouch sem saltaði sár Arsenal-manna með þrennu á Anfield. Þetta var fyrsta þrenna hans í ensku úrvalsdeildinni.

Mikilvægasta þrennan sem skoruð hefur verið í þessu klassíska einvígi kom þó frá Frakkanum Thierry Henry vorið 2004. Henry var sjóðandi heitur þetta árið og tryggði Arsenal 4-2 sigur á Liverpool með þrennu sinni. Þar spilaði Arsenal 33. leik sinni í röð án taps í úrvalsdeildinni og þremur leikjum síðar tryggði liðið sér titilinn með því að skella erkifjendum sínum í Tottenham á útivelli.

Það má því eiga von á skemmtilegum leik á sunnudaginn þegar þessi stórlið mætast á ný, en Arsenal mætir á Anfield fast á hæla ótrúlegs 7-0 sigurs í Meistaradeildinni í vikunni.

Hér fyrir neðan er listi yfir einvígi sem hafa leitt af sér flestar þrennur leikmanna frá stofnun úrvalsdeildarinnar.

4- Arsenal - Liverpool

3- Arsenal - Ipswich

3- Arsenal - Leicester

3- Arsenal - Southampton

3- Coventry - Leeds

3- Everton - Q.P.R.

3- Liverpool - Newcastle

3- Liverpool - Southampton

3- Man. United - Newcastle

3- Man. United - Southampton