Hargreaves spilar um helgina

Enski landsliðsmaðurinn Owen Hargreaves er nú tilbúinn í slaginn með Manchester United eftir erfiða baráttu við meiðsli og kemur til með að spila með liði sínu gegn Middlesbrough um helgina. Þetta staðfesti Sir Alex Ferguson knattspyrnustjóri í dag.

Hargreaves hefur ekki spilað nema þrjá leiki fyrir United síðan hann var keyptur á stórfé frá Bayern Munchen og svo gæti farið að hann yrði í byrjunarliði United um helgina.

"Owen er klár og mun spila, sem eru frábærar fréttir og staðfesta að það var rétt hjá okkur að gefa honum tíma til að jafna sig á hnémeiðslunum," sagði Sir Alex í dag.

"Við reyndum að sleppa því alfarið að gefa honum sprautur en það var ekki hægt. Hann fékk sprautu fyrir nokkrum vikum og er nú tilbúinn að spila. Hann var mjög ósáttur við að geta lítið spilað, enda kom hann ekki hingað til að vera áhorfandi. Hann er með gott hugarfar og mun nýtast okkur vel," sagði stjórinn.