Dreymir um að taka við Tottenham

Juande Ramos lýsti því yfir í viðtali við spænska miðla í morgun að hann væri spenntur fyrir að taka við Tottenham. Forráðamenn Sevilla vilja ekkert segja um mögulega brottför þjálfarans til Englands, en leikmenn Sevilla hafa áhyggjur af ástandinu.

Talsmaður Sevilla vildi lítið gefa upp um stöðu mála þegar Sky fréttastofan hafði samband við hann eftir hádegið.

"Ramos er enn þjálfari Sevilla og félagið hefur ekki skipulagt neinar tilkynningar um annað í nánustu framtíð," sagði í yfirlýsingu frá félaginu.

Spænskir og enskir miðlar fullyrða hinsvegar að verið sé að vinna í því að fá Ramos til að skrifa undir fjögurra ára samning við enska liðið. Talið er að það eina sem standi í vegi fyrir því að Ramos fari til Englands séu þær himinháu fjárhæðir sem spænska félagið vill fá fyrir að leysa hann undan samningi.

Ramos sjálfur virðist vera búinn að gera upp hug sinn ef marka má það sem haft er eftir honum í Cadena Ser. "Tottenham verkefnið er stór draumur fyrir mig," sagði þjálfarinn.

Brasilíski framherjinn Luis Fabiano hjá Sevilla lýsti yfir áhyggjum sínum á blaðamannafundi í morgun. "Það yrði slæmt fyrir félagið ef hann færi, en við reynum eins og við getum að einbeita okkur að næsta deildarleik."