Hicks styður Benitez

Tom Hicks, annar aðaleigandi Liverpool, hefur lýst yfir stuðningi sínum við Rafa Benitez knattspyrnustjóra þrátt fyrir annað tap liðsins í röð í Meistaradeildinni í gærkvöldi.

Liverpool tapaði 2-1 fyrir Besiktas í Tyrklandi og hafa möguleikar liðsins á að komast upp úr riðlinum minnkað til muna þar sem aðeins eitt stig er í húsi eftir fyrstu þrjá leikina.

Benitez hefur verið gagnrýndur nokkuð upp á síðkastið eftir að Liverpool átti fína byrjun á tímabilinu og þótti lið hans fremur hugmyndasnautt í Tyrklandi í gærkvöld.

"Við styðjum við bakið á Rafa. Hann er rétti stjórinn fyrir okkur og hann hefur t.d. stundað það að gera reglulegar breytingar á byrjunarliði sínu í þrjú ár - svo það er ekkert nýtt. Hann hefur sýnt að hann er mjög hæfur til að stýra liðum í Meistaradeildinni," sagði Hicks og bætti við að hann hefði trú á því að liðið gæti unnið þrjá næstu leiki sína og komist áfram upp úr riðlinum.