Drogba: Chelsea hentar Ballack illa

Didier Drogba virðist ekkert ætla að slaka á í yfirlýsingum sínum í blaðaviðtölum og í dag lýsir hann því yfir í viðtali við Sun að Michael Ballack hefði frekar átt að ganga í raðir Manchester United eða Arsenal frekar en Chelsea.

Ballack hefur lengst af átt erfitt uppdráttar síðan hann gekk í raðir Chelsea í fyrrasumar en hann hefur átt við meiðsli að stríða á þessari leiktíð. Drogba tekur undir þetta og segir hann henta Chelsea illa.

"Það er erfitt fyrir Ballack að spila hérna því Chelsea spilar mjög sérstakan leikstíl. Hérna reynir meira á framlag einstaklinga og ég er viss um að hann hefði náð sér betur á strik í leikkerfi eins og hjá United eða Arsenal. Þessi lið treysta meira á jafnvægi og flæði í spilamennsku sinni og þar held ég að hann myndi passa betur inn í hlutina. Það er því ekki víst að Chelsea sé rétta liðið fyrir Ballack," sagði Drogba.