Losaðu þig við Berbatov

Harry Redknapp, stjóri Portsmouth, hefur skorað á kollega sinn Martin Jol hjá Tottenham að losa sig við framherjann Dimitar Berbatov úr liðinu.

Redknapp skrifar reglulega pistla í dagblaðið Sun og hann lætur búlgarska framherjann hafa það óþvegið í nýjasta pistli sínum.

"Það síðasta sem Jol þarf núna er að Berbatov fari í fýlu þó hann fái ekki að byrja hvern einasta leik. Maður sér oftast hið sanna innræti manna þegar á móti blæs og hann sat á bekknum gegn Newcastle með fýlusvip eins og stórt smábarn. Allir vita hvað Berbatov getur og hann sýndi það í fyrra þegar hann skoraði grimmt, en hann hefur ekki verið góður í ár og virðist spila fyrir sjálfan sig en ekki liðið. Hugarfar hans á St. James´ Park virtist ekki gott og hann sendi frá sér neikvæð skilaboð," sagði Redknapp og bendir á Robbie Keane sem jákvæða fyrirmynd.

"Þegar liðið er í erfiðleikum þarf það á sterkum karakterum að halda og það hefur Robbie Keane gert. Berbatov ætti að sýna sama hugarfar og ég hef alltaf sagt að þegar menn missa hugarfarið eigi þeir að fara - alveg sama hvað þeir eru góðir."

Tottenham mætir Getafe á heimavelli í Evrópukeppni félagsliða í kvöld og þá verður gaman að sjá hvort Martin Jol tekur orð Redknapp til greina. Leikurinn er sýndur beint á Sýn klukkan 18:40 í kvöld.